الجمعة، 16 سبتمبر، 2011

نعى شخصى

 النعى شخصى
والنعى نعيِ
مات الواد اللى كانت
اول خطاه دليلها ضل بنوته
عاش عمره ميعرفهاش
مات الواد الارض الواسعه
لأحلام حبايبه اللى مطرحهاش 

مات الواد 
اللى
كان بيجيب شعره ع الجنب 
مظنة ان ترجيعه ده يبقى صياعه 
مات الواد اللى كان بيلازم
اخر تخته من بعد رفقاته 

مات اللى عاش حياته
فى السر
حب وعشق فى السر 
كتب واتعذب فى السر
ومعرفش هو ليه مضطر
على السكات
مااات اللى ساب
وصيه
موته يبقى لعيشته
امتداد

محمد البغدادى

الاثنين، 22 أغسطس، 2011

الى شهدائنا ع الحدود

محدش عاد

ع طرف البلد يستنى

ولا تعملى حسابى

ف العشا يا اما

وفى مكانى

...ابقى اكتبى

ابنى الغالى

وبأذن العالى

مسيره الجنه



واكتبى كمان

ابنى ما كان

حلمه الجنازه الحربيه

ولا يحضر دفنته

م الرتب ميه

ابنى كان همه البندقيه

وراحت روحه تمنها





واكتبى كمان يا اما

انى كنت مصرى

ولجل كونى

بكوا عيون اللى حبونى

ايه ذنبها فى احزانها



واكتبى كمان وكمان

عندى لسه كلام

مضطر اقول سلام

وبأذنه نتلاقى ف الجنه


بغدادى