الاثنين، 5 مارس، 2012

خانة المرسل اليه


حاجات كتير مات بفعل الزمن
ومنها الجوابات مراسيل العشاق
كان زمان الجواب ده فن
ورسم الورود وزخرفة الخط
وكتابه حبه اغانى فى الجواب
وكان اللى بيكتب جواب ده
عيل بايظ
واللى بتقراه
بنت مش مؤدبه
وفضلت اكبر واكبر
واصحابى بيكتبوا جوابات
وانا بعض فى صوابعى
من السهل الكتابه
بس كان فيه خانه ناقصه فى الجواب
المرسل اليه
مش معروف
كنت من اللى بيكتبوا الجوابات لزمايلى
عشان حسن الخط
وبشاير كتابات حلوه كانت بتأهلنى للكتابه
وكنت بكتب لاصحابى القريبن جدا
وكان الجواب احيانا بتباع با اسعار عاليه جدا
ممكن توصل لجنيه او اكتر
وفضل حلمى املى خانه المرسل اليه
لكن مش لاقى السطر ده فى الجواب

وفضلت احلم انى املى الخانة دى
لحد ما مات الحلم
وراحت الجوابات
............
محمد البغدادى